耶教能人#006：熄爐歸主

「息勞歸主」，係常見嘅祭輓文句，與「主懷安息」、「睡主懷中」近義，似乎暗示人生都有可能係個不斷食屎嘅過程，唯有等到離世與基督同在，才算真正好得無比。不過，係咪唯有死亡／永生，先可以中止呢種生活？平日間中熄熄爐，又得唔得呢？ 上主創造世界之後，賜福第七日為安息日，而十誡中的第四誡，就叫以色列人「當記念安息日，守為聖日」（出二十11）。舊約學者布魯格曼更曾指出，安息日誡命清楚反映：一、耶和華唔係工作狂；二、耶和華並不重視受造世界要達致full function；三、受造世界要幸福，唔需要依賴不斷工作。（參Walter Brueggemann, Sabbath as Resistance, 2014） 觀乎信徒在世，教牧希望信徒多花時間參與教會生活，因此有教會一星期至少三日聚會，星期三祈禱會、星期六團契、主日擘餅主日學崇拜愛筵直落；又有教會因為時間太多太chur，而決定一站式處理，務求喺最短時間做到最多宗教活動。兩個極端，其實嘗試回應緊信徒生活嘅咩問題？提出改變，背後又有咩（神學）思考？ 古語有云：「時間就係金錢。」如果你的財寶在哪裡你的心就在哪裡，唔好咁著緊得唔得呢？抖抖氣，重拾生活節奏，得唔得呢？今期《耶教能人》希望同大家一齊喺忙碌嘅日常同教會生活中，尋找休息空間，與自己、與教會想法對話，並狂想教會如何以新形式配合時代轉變。 唯有熄爐，方可真正歸主。 專訪一　恩明之聲──再思前現代教會生活 專題　熄爐歸主 專訪二　得救在乎追趕業績？專訪安息達人趙崇明