苦慼Khó͘-chheh

內容簡介 苦，是台灣島嶼ê身世kap運命 慼，是歷史底層、失聲者、受壓迫者ê心聲台文新生代作家杜信龍，以人道ê關懷，對台灣苦難ê歷史起筆，繼承台語文學釘根土地ê寫實傳統，透過虔誠有力ê詩文，替台灣被殖民ê歷史kap記錄、替台灣拍拚ê英雄kap庶民留下見證。伊聲聲呼叫台灣人、台灣民族teh beh失落ê母語、精神kap記持，關心土地、行向世界，以十冬粒積ê書寫kap意志，獻hō͘台灣。◎本冊採用傳統白話字，漢羅用字參考《台文通訊BONG報》。 ◎本作品榮獲國藝會出版獎助 真情推薦 Sìn-liông ê si leh kho͘, kho͘ lán Tâi-oân-lâng chò tńg-khì chin-chiàⁿ ê lâng.──Lîm Jū-khái（台灣文學系助理教授、台語詩人、歌仔冊作家） 《苦慼》有苦。總–是，文字ê khùi力帶來安慰，母語詩是台灣苦thàng ê救贖。──陳慕真（國立成功大學臺灣文學系助理教授） 作者介紹 作者簡介 杜信龍　Tō͘ Sìn-liông 1981年台南灣裡出世，2006年中央大學電機所碩士畢業。現此時，佇外商公司上班，無受過正式台語教育kap文學訓練。2013年6–月，ùi台北轉來府城，智覺厝內阿姊lóng講華語，造成kan-taⁿ會曉講台語ê老母壓迫。自按呢，家己開始學習寫台文、熟似台語人（台文筆會）、讀台語冊，欲kā台語khioh–轉-來。向望家己未來ē-sái為台語文學kap台語ê地位來phah-piàⁿ，走chhōe母語ê尊嚴。2023年出版台語小說集《放毒》。 目錄 推薦序｜歡喜讀《苦慼》／Lîm Jū-khái 推薦序｜為著bē-tàng講話–ê出聲／陳慕真 踏話頭｜大願／杜信龍Chapter 1 思念kap記持 先行 斷chat ê詩chōa──Hō͘ 老爸 Kùi紙 阿爸ê茶車 歹勢，你講啥？ Hō͘ 母親ê冊 煞 鏡──Siáng對siáng講話 老 我kap死講話 等 擔–起-來──Hō͘胡長松老師 風──Hō͘張炎憲教授 寫Hō͘府城守謢者──巴克禮傳教士（走揣台語文ê歷史） 我m̄是孤單一个人──Hō͘鄭兒玉牧師 斷水──Hō͘ Marcus 山難記事 打狗情歌 上尾ê薰田 草猴──Hō͘ Cinderella 媽祖渡海──寫hō͘ 陳達先（sian）唱 民謠唱人生 好笑神ê你，順行！──記念廖瑞銘教授Chapter 2 中華民國時代．二二八事件．白色恐怖 Hō͘鄭南榕 你先行 我隨行 無 死目m̄願kheh──Hō͘阿樺 掠蛇使者──Hō͘王金河／謝緯醫生 麥仔入塗──台灣『史懷哲』謝緯 火燒百合花──柯旗化 牽掛──Hō͘台獨先行者陳智雄 失算──Hō͘陳文成 詩ê秤頭 新樂園──Hō͘丁窈窕 無國ê人──Hō͘許昭榮 王育德，無tńg–來 Tò͘-sàng──Hō͘羅天賀二二八受難者 二水戰士──陳篡地 遲到ê遺書──Hō͘蔡鐵城 Hō͘鱸鰻查某ê情歌 來揣陳澄波食冰 我m̄ bat藝術 畫筆──寫陳澄波 來tńg──Hō͘台灣ê『南丁格爾』陳翠玉 一隻尾蝶仔 打狗踏查──記高雄雄中二二八陳仁悲訪談 阿母hoa–去ê春天──詩寫陳新吉 獨唱人生──Hō͘高菊花 赤theh-theh ê榮光 Têng-tâⁿ 將軍玫瑰──記孫立人將軍舊厝 桃城m̄是逃城 濁水溪ê háu疼──讀《濁水溪三百年：歷史．社會．環境》 虛構ê目屎 後一改雨期──讀《幽暗角落的泣聲》 Chapter 3 原住民相關 春のさほ姫よ──Hō͘ Uyongu Yata’uyungana （高一生） 內籬仔ê十字架──Hō͘湯英伸18 歲ê性命 Miyome 安魂曲 夢–裡ê約誓──記Lawa Toyu ／柯菊蘭 久見，我真正ê祖靈！──一位無Hō͘官方承認ê原住民 Manapan ê幻影 Lamungan 遺跡 拍ka-la̍uh ê祖靈──記水沙連郭百年事件 後一場夜祭 流浪ê牡丹 Inawan 紅頭嶼 Kavulungan 源頭 霧社記事──Hō͘ Mona Rudo Chapter 4 原住民相關 掛心──Hō͘苗栗八叔（1922～1935/4/21） 拍ka-la̍uh ê亡魂 大里杙（Tāi-lí-khi̍t）踏查──記訪林爽文古厝 Chhio──國姓改編傳奇 戴潮春事件──查封公記事 Chapter 5 日本時代 樹靈塔──一个文史家對阿里山ê見解 失–去ê甜──記后里糖廠 銅鑼走味ê山歌 尖筆山血路 倒tńg──記通霄踏查 Chapter 6 國際議題 Ta-lian ê青春―Hō͘ Amos Yee Iau飢ê囡仔 幸福ê徛家―Hō͘ tī香港反送中被兇殺死ê 15歲查某囡仔陳彥霖 你留tī桌仔頂ê紙條仔 我m̄是家己ê我 隔離―Hō͘李明哲 刺酸―記黃之鋒絕食行動 寫作kap發表記錄 收回 序 推薦序 為著bē-tàng講話–ê出聲 陳慕真（國立成功大學臺灣文學系助理教授） 《苦慼》是杜信龍ê第一本詩集，是一个台文詩人十冬（2014～2024）來ê粒積。Chiâⁿ做台文界新生代ê杜信龍，chit十冬來，骨力、綿爛用台語文寫作，tiāⁿ-tiāⁿ得著國內各大文學獎ê肯定，是台語文學界優秀ê詩人、小說家。 杜信龍ê詩質量齊勻，詩chōa有力頭。伊ê詩表現出一種對台灣歷史ê虔誠，筆尖通常是嚴肅ê khùi口，tài批判性ê質問kap對正史ê giâu疑。伊ê詩寫台灣史上ê英雄人物、二二八kap白色恐怖受難者、民主運動先行者、原住民、香港反送中運動者、新疆集中營受難者，關照ê面向包含台灣kap國際。 Lán ē-sái講，伊ê詩徛tī歷史底層、失聲者、受壓迫者chit爿，chit款書寫位置顯明ê人道關懷m̄-nā是正港台灣文學ê DNA，mā延續戰後台語文學關心土地、歷史、政治ê書寫傳統。特別是，tī《苦慼》–裡，lán一再感受著詩人對「記持」ê強調，透過不斷描述台灣被殖民ê歷史kap記錄無仝時期為台灣犧牲ê前行者，呼召「台灣人kiōng-beh ka-la̍uh ê記持」，beh kā失去記持ê台灣人叫精神。對台灣民族母語ê失落，台灣人失憶ê症頭，詩人迫切ê意志tò͘過詩稿，親像teh宣示、teh申冤，催迫讀者面對台灣歷史，深思。 假使詩集有色水，《苦慼》應當是沉重ê烏墨色。國家暴力、性別暴力對人類性命ê thún踏kap搶奪，chiâⁿ做一字一字苦澀kap thàng疼。總–是，lán mā不時讀著詩人機巧ê鋪排ia̍h是溫柔ê詩chat，hō͘ lán感受著詩ê美好。親像，tī〈我m̄ bat藝術〉，杜信龍描寫陳澄波ê牽手張捷，將陳澄波hō͘國民黨政府銃殺ê血衫，藏tī神主牌後壁：「藏畫ê查某人恬恬　藏bih tī神主牌ê血證/是監查看bē著ê kap縫　拍破獨裁ê章回」。Tī〈夢–裡ê約誓〉，記錄Atayal 族最後一位刺面國寶Lawa toyu （柯菊蘭）別世，文明mā tòe leh失–去：「Koh替我hip幾張相　上無博物館ē有寡路用/無定有人ē為伊ê意象寫詩/重新講起lán對性命ê尊chhûn /上無文字bē tòe我爛–去─假使有人讀有」。Tī〈歹勢，你講啥？〉，khau洗台灣語言tī母土失聲ê hàm古：「Lín是佗一tah ê人/Lín是leh講啥/Kám ē-sái講阮chit國ê話/規家伙仔人lóng變成阿啄仔/歹勢　你講啥？」。 Tī〈麥仔入塗〉，詩人書寫謝緯醫師。犧牲ê結局藏tī溫柔ê開場：「天未光　玉蘭ê清芳提早結束/月娘將你ê睏眠剪做兩koe̍h/日頭bē記得替你照路tńg–去/麥仔恬恬入塗等待結穗/Chiâⁿ做未來飽tīⁿ ê子」。Tī〈阿爸ê茶車〉，杜信龍描寫阿爸過身以後，對老爸ê siàu念。短短ê詩chōa，soah真幼路來講出台灣爸仔囝有站節ê感情：「逐工斟一杯hō͘ chhia倒運命ê你/請你講–幾-句-仔mā好　沖泡ê時間歹liú-la̍k」。 以台灣歷史敘事做主線，為著bē-tàng講話ê人kap歷史出聲，用súi-khùi koh toaⁿ-tiah ê台語行文，透過漢羅文體自由反映台語口語，飽tīⁿ ê使命感透lām思想kap感情──我想，十冬來，杜信龍已經建立伊家己詩ê風格。期待後一个十冬，lán koh ē-sái繼續讀著伊ê台語詩。 《苦慼》有苦。總–是，文字ê khùi力帶來安慰，母語詩是台灣苦thàng ê救贖。 序 大願 杜信龍 總算，來到chit步–ah。 舊年（2023 年8–月）出hit本小說《放毒》，是機緣mā是gōng膽，上kài重要–ê是家己kā自尊放下kap接受一寡無完美ê所在。 真感謝家己ê粒積，無放棄。真正行–過，chiah知簡單–ê無影簡單。 確實，無人án-ne呵咾家己。 Tī chit个無正常ê教育體制kap國度，你無án-ne是beh按怎kā母語chiú hō͘ tiâu–leh ？阮ê台語路重重疊疊，雖bóng有一寡siăn-pái有時仔ē kā阮指導，總–是，上重要–ê是阮家己–lah。 學習按怎學習！佳哉，阮是愛學習ê人，mā大概知影一套方法，koh有一粒堅持ê心。 M̄是beh刁工褒家己，是beh鼓舞家己，「你koh進一步–ah。」 Kap任何箍仔仝款，台語箍仔有一寡問題。阮bat深深反省，家己設一寡規則1 照起工行，m̄-thang hō͘家己行m̄知路。無，上重要ê任務soah放bē記–得—母語。Che路的確ài沓沓仔行，chiah ē久長。Kap濟濟siăn-pái仝款，mā bat hē過大願，滿滿ê熱情。五、六冬過，七、八冬過，一冬koh一冬阮lóng有修正kap調整。Taⁿ，十冬–ah